ADVERTORIAL

Bahasa-bahasa lain: Kadazandusun, Bahasa Inggeris, Bahasa Malaysia

Demokrasi beparlimen di menua kitai udah jauh bendar ngerichau sereta limping ari pejalai asal iya lebuh bala kaban parlimen diansak bekereja nyentuk ke pukul 5 dini hari kena 6hb Empat 2017 dikena nyungkak sereta ngangkatka perambu-perambu undang-undang semina ketegal ti meri awak ngagai pengari Parlimen Marang, Dato’ Seri Hadi Awang, peluang mantaika perambu undang-undang dikena ngubah undang-undang penyalah dalam Kot Shariah Akta 1965 (Akta 355) kena tengah hari 6hb Empat, ba hari ti penudi Aum Parlimen.

Taja pan Speaker nyekat sara penemu Hadi Awang enggau raban iya ari Kota Baru, perambu undang-undang nya enda puntan naka nya. Hadi deka majak ke pengawa iya mantaika Perambu Undang-Undang nya, ti endur bala pengari ari perintah deka terus bejai bala kaban penyakal ari ti ngumbai sida “mechat Islam” (ke bala orang Islam empu) tauka “munsuh Islam” (ke bala orang ti ukai bepengarap Islam) lalu nyentuk ke perambu nya deka diterima ila, perambu nya deka dibantaika ba tiap aum parlimen. Nya alai rakyat Malaysia patut mantah perambu undang-undang nya, lalu dirintaika ditu sekeda kebuah iya.

Bala kaban parlimen ti nyukung perambu Undang-Undang 355 enggau batang penemu Shariah ti besai agi rampa udah ngeringka penemu sida ngetanka jaku Melayu-Islam enggau meresi penemu perintah bekoloni baka ke dulu menya.

Nitihka penemu sida nya, ba pengawa ngerembaika undang-undang Shariah nya deka meresi menua Malaysia ari runding angkunka koloni lalu dikena nirika pemanah Islam. Ba penemu Hadi tu, pengawa ngetanka sistem undang-undang rama nya asil ari runding kolonisasi. Nitihka penemu Hadi Awang dalam Amanat Hadi 1981 ti tebilang nya, iya udah ngutuk Barisan National laban sida nya udah ngetanka “undang-undang koloni, adat orang ti enda arap enggau adat sebedau Islam”.

Raban penyukung nya madahka bungkur undang-undang Kot Shariah ke diatu, ngeletak ukum tutup (tauka jil) 3 taun, ukum ngena mata duit RM5,000 enggau ukum 6 kali sipat, lalu baruh agi ari Majistret Kelas Satu (ukum tutup 5 tahun, ukum mata duit RM10,000 enggau ukum sipat 12 kali), nya enda engkeman, laban ngengkahka Kot Shariah ba tikas ti baruh; lalu enggau nya tiap iku orang Islam patut bempu tanggungpengawa ngangkatka kuasa Kot Shariah awakka sebaka, enti enda tinggi agi ari Kot Sivil. Raban sida nya mega madahka perambu undang-undang nya enda bekaul enggau ukum Hudud lalu nadai besangkut-paut enggau orang ti ukai bepengarap Islam, lalu sida nya enda patut enggau besaraka penemu ba perambu nya.

Kami tetap deka mantah tuduh penemu nya.

Ke terubah iya, menua Malaysia tu ditumbuhka dalam taun 1963 nyadika serakup menua beperintah ngatika diri ti dikelala enggau nama Serakup Malaya (Federation of Malaya) (sebengkah menua ti udah betuanka sereta dijaga perintah British), sama mega enggau tiga buah koloni British ti bukai iya nya Borneo Utara (udah nya dikelala enggau nama Sabah), Sarawak enggau Singapura. Serakup Malaya ukai semina ditetapka nyadi serakup sekular ti endur pengarap Islam nya nyadika “pengarap rasmi Serakup” semina dikena ba atur adat enggau daya idup aja, lalu ke lebih besai agi reti nya, menua Sabah enggau Sarawak ti ukai ari “Menua-Menua Melayu”, enggau temegah ati ngetanka pengaya adat asal enggau daya idup sida ti datai ari mayuh pupu raban bansa ti mit-mit. Ari nya, menua Malaysia nya ukai dikerembaika ari Serakup Tanah Melayu, lalu pia mega ukai betuju dikena ngambi pulai Perintah Sultan ke menua Melaka ngena Undang-Undang Shariah.

Tang, menua

Malaysia nya serakup menua beperintah sekular ti diperintah ngena Undang-Undang Rama (Common Law). Konstitusyen Perintah Federal (Federal Constitution) tauka sistem Undang-Undang Rama nya ukai betuju dikena ngemaruhka pengarap Islam. Undang-Undang nya mih ti udah dikena nempa lalu niri-negika sebuah menua ti begela Malaysia dalam taun 1963 nyentuk ke sehari tu.

Sebedau kitai lalek, atur megai pengarap nitihka peneka diri bisi ditekanka lalu nyadika jamin lebuh langgur numbuhka menua ti benama Malaysia menya. Enti undang-undang Hudud bisi kala disebut menya, tentu projek nempa menua Malaysia nya enda nyadi, laban dibantah bala rakyat menua Sabah enggau Sarawak. Semengat dalam Sempekat Malaysia 1963 (MA63) enggau Konstitusyen Perintah Federal – ti nyadika dua batang penemu ke kontrak sosial ba penumbuh menua kitai – patut dibasa lalu ditanka.

Ke-dua, sekularisma nya mai reti sistem undang-undang patut bepelasarka undang-undang rama dikena atas semua peranak sesebengkah menua lalu adat dalam jalai pengarap tauka adat basa nya semina dikena ke guna diri empu aja enggau ke guna ba diri sebilik dalam sesebengkah raban bansa. Langkar Ke-Semilan dalam Konstitusyen Perintah Federal netapka pechara ba sebarang penyalah diatur ba kot-kot sivil lalu ngemendarka sebarang menua dalam serakup nya “[ngukum] sebarang penyalah dipejalaika sebarang orang ti bisi penemu dalam pengarap Islam, kelimpah ari sekeda pekara ti disengkaum dalam Lis Perintah Federal”. Perambu Undang-Undang 355 – ti dibantaika dalam taun 1965 lalu diubah dalam taun 1984 – semina engkeman dikena dalam serangkung penyalah-penyalah Shariah aja lalu besenutuk enggau Konstitusyen Perintah Federal kitai.

Sekat ti diperambuka dalam undang-undang Hadi Awang – ukum tutup 30 taun, ukum mata duit RM100,000 enggau ukum 100 kali sipat – dipeda nyau ka sebaka enggau ukum penyalah ba Kot Sesyen, semua ukum dikemendarka undang-undang semina ukum bunuh.

Enti penyalah ti berat baka penyalah nerumpak semina tau diukum Kot Sesyen enggau ukum pengabis besai 14 taun enggau ukum mata duit tauka ukum sipat, nama reti penyalah enti dikereja orang Islam patut ditinggang ngena ukum tutup 30 taun, ukum mata duit RM100,000 enggau ukum sipat 100 kali?

Dini endur prinsip senimbal enggau sama-rata dalam pechara ke penyalah rama?

Ke-tiga, nyata bendar mih pemula ti madahka perambu undang-undang 355 nya nadai bekaul enggau pemun ukum Hudud. Enti diterima lalu dikemendarka dikena, undang-undang 355 nya deka ngidupka ukum shariah ba penyalah rama di menua Kelantan enggau Terengganu – ukum 100 kali sipat enti ditemu buya beleman tauka bambai, 80 kali sipat ke penyalah sapa-sapa orang ditekanka butang ti enda ibuh bepenerang tauka beleman chara ti nyelai (qazaf) enggau 40-80 kali sipat enti ditemu buya ngirup arak. Ukum Hudud dipeda ulih ngubah reti undang-undang sekular. Iya deka ngapuska pelasar moral penumbuh Malaysia ti nyadika serakup menua besekular.

Ke-empat, pelasar Shariah nya intu sama-rata, pemaik enggau pengelantang mensia, ukai semina nyadika temegah raban orang Islam aja. Nadai kala bisi penyaru runding entara pengawa ngulihka intu sama-rata lalu pengarap Islam mega besemaya mai “berekat ke selampur dunya” (Rahmatan lil alamin). Pengawa manah dikena ngemansangka intu pengelantang dalam Shariah patut ditujuka ba pemesai guna Shariah nya empu (Maqasid Syariah) lalu enda patut ngemeranka ngaga ukum penyalah besai agi, ti suah agi melakangka konteks ti enda tetap. Kot-kot Shariah ulih sereta patut digaga tegapka agi ba aspek bukai, ari proses dalam penemu diri empu enggau atur pechara dikena ngenegapka ukum. Kelimpah ari ti ngemaruhka sereta ngumbai undang-undang rama kitai nya “kapir” lalu ngemansangka kuasa Kot-Kot Shariah nyadika pengeransing sesebengkah raban orang, atur pengawa ngemasukka penemu-penemu ti beguna ngagai sistem undang-undang rama ari Maqasid Shariah awakka undang-undang rama kitai tu tau manah agi lalu dikerinduka orang mayuh.

Ke-lima, propaganda ti madahka perambu Undang-Undang 355 nya enda ngachau orang ti ukai Islam nya mega tau mai penyaru runding sereta nipu. Enti sema bisi penyarut ti bisi kaul enggau, sekali ke orang nya orang Islam tauka ukai, kot-kot sivil deka nurunka kuasa sida ngagai Kot-Kot Shariah. Kitai udah meda sekeda pekara ti udah nyadi ti endur raban Orang Asli enggau orang asal ti deregister nyadi orang Islam ti pelesu. Bisi mega atur mejal bala anak patu-balu masuk nyadi orang Islam ba rumah-rumah pengintu pengelantang nembiak. Bisi mega kes tubuh orang ti ukai Islam ti udah mati diambu lalu ditumbakka ba pendam orang Islam. Ngemasukka sapa-sapa ngagai pengarap Islam nya pengawa ti mudah bendar, tang pansut ari pengarap Islam nya atur ti mar bendar. Ba sekeda atur ti baka tu, mar bendar kitai deka betalatka tauka besaraka penemu ti madahka undang-undang Shariah nya enda nanggul orang ti ukai bepengarap Islam.

Ke-enam, sara penemu ba atur ngangkat undang-undang Shariah nya patut dipejalaika enggau chara tebuka sereta nyata lalu sekeda ari peranak menua tu ti ukai Islam enda patut dikumbai raban “kapir ti mangah”. Sebengkah sara penemu tauka tanda setuju ba undang-undang Hudud enggau ukum ti kasar ba dunya kemaya hari tu, patut dikelala ngena undang-undang ti engkeman. Enti diatu nadai batak-asur ba bantah ngagai undang-undang 355, nama agi peluang ti manah endur mantah iya ke dudi hari enti undang-undang nya udah dipenyadi?

Kami ngangauka semua orang di Malaysia tu ngelindung menua tu awakka tetap nyadi serakup menua sekular baka ti dikedeka sereta didirika sida aki-ini kitai dalam taun 1963 menya. Kitai tu benung mechat atur “pechah lalu perintah” ti dipejalaika sekeda raban orang. Propaganda ti madahka undang-undang Hudud nya semina dikena ba Semenanjung Malaysia nya penemu ti ngasuh saru runding sereta nipu. Penemu nya melakangka penemu ti nyata pasal beratus ribu iku raban orang Islam ari Malaysia Barat tu, ti belajar, bekereja, diau, tauka bejalai ke menua di Semenanjung Malaysia. Enti sema undang-undang Hudud nya udah dipejalaika ila, raban sida tu tentu deka kena bungkur undang-undang tu ngena tiga ukum baka ti benung dikena di menua Kelantan enggau Terengganu, tauka ukum tutup enda kurang ari 30 taun, ukum mata duit enda baruh ari RM100,000 enggau ukum sipat enda kurang ari 100 kali. Ukum tu tentu deka dititihka menua-menua bukai di Semenanjung Malaysia din. Raban orang ti enda kena bungkur undang-undang tu nya bala sida Yang di-Pertuan gong enggau bala Raja-Raja Melayu aja baka ti ditetapka Kot Istimewa ba Artikel 182, ukai mungkur bala orang Islam ari Sabah enggau Sarawak.

Bala tuai ti udah enggau numbuhka menua Sabah enggau Sarawak menya nadai kala besetujuka penumbuh serakup Malaysia ti tau endur pengawa salah orang Islam tau diukum berat agi ari penyalah nerumpak. Atur belalai ngubah kontrak kaul sepengudah beserakup dalam pengelama 54 taun nya tau bendar pulai ke penusah semua atur enggau peranak menua tu ba segi moral enggau politik. Sapa-sapa orang ti berambun nyawa ngubah serakup Malaysia ti semina pulai ke penguntung politik sida empu deka napi bantah ketegal pengamu sida nya.

Ke Pemaik enggau Pengelantang Menua Malaysia, Tulak Mih Perambu Undang-Undang 355.

Penandatangan:

Tan Sri Datuk Seri Panglima Simon Sipaun, mantan Setiausaha Kerajaan Negeri, mantan Naib Pengerusi SUHAKAM, Sabah
Datuk Dr Johan Arriffin A. Samad, mantan Timbalan Pengarah Yayasan Sabah, ahli G25, Sabah
Datuk Amin Satem, ahli G25, Sarawak
Datuk Donald Peter Mojuntin, Setiausaha Agung UPKO, mantan Pembantu Menteri Kewangan, Sabah
Datuk James Ligunjang, mantan ADUN, Sabah
Datuk Jema Khan, mantan Ketua Pemuda UMNO Negeri, usahawan, Sabah
Datin Fazar Arif, Sabah
Datuk Stan Yee, mantan Presiden Majlis Perbandaran Kota Kinabalu, Sabah
YB Baru Bian, ADUN Bakelalan, Pengerusi PKR Negeri, Sarawak
Haji Amde Sidik, Timbalan Presiden SAPP, ahli akademik, Sabah
Haji Ramlee Dua, mantan ADUN, mantan Pegawai Daerah, Sabah
Adrian Yong, mantan CEO syarikat, Sabah
Asgari Stephens, ahli G25, usahawan, Sabah
Jannie Lasimbang, Ketua Wanita DAP Negeri, mantan Pesuruhjaya SUHAKAM, Sabah
Karen Shepherd, aktivis Sarawak 4 Sarawak, penulis, Sarawak
Kartina Salleh Sulong, peguam, Sabah
Marinah Harris Salleh, usahawan, Sabah
Peter John Jaban, aktivis Sarawak 4 Sarawak, Sarawak
Valentine Willie, mantan Presiden Persatuan Undang-undang Sabah, Sabah
Zahir Ahmad, mantan CEO syarikat, Sabah